مشروعي "فارفالا - farfalla" ومعناه فراشة بالايطالي.
واخترت اللغة الايطالية لأنه فيها اول وأكبر معرض للفراشات وفيها ما يقارب ٦٠٪ من انواع الفراشات النادرة. المشروع متخصص بتوظيف الفراشات بعد تحنيطها في الاعمال الفنية.
اسمي غدير ابو مشعل 26 سنة من غزة خريجة محاسبة وتمويل بتقدير امتياز لكن ما كان عندي شغف بحب الارقام، كنت بحب الطبيعة، وبس اشوف الاشخاص إلي بترسم، كنت اتمنى اكون مثلهم بس للأسف من صغري كنت فاشلة بالرسم، بس هاي المرة لقيت شغفي وقررت اتعلم الرسم ، وبالفعل كنت أخذ كورسات بين محاضراتي الجامعية وتعلمت وكان إلي بصمة بمجال الفنون زي المحاسبة وأكثر كمان.
كان للفراشة نصيب كبير من رسوماتي وكنت كل ما اشوف فراشة أحب اراقبها وأحس بحب كبير لما تهدي ع ايدي أو كتفي.
بعد ما خلصت جامعة قررت اتعلم اكثر عن عالم الفراشات ودرست كل شيء عنهم وكنت كل ما اقرأ أكثر يزيد اعجابي أكثر بالمجال واتعجب أكثر من صنع الخالق سبحانه.
فكرة المشروع ما كانت خاطرة على بالي بالمرة، لحد بيوم وأنا بقلب الانستجرام طلع بوجهي فيديو لشخص بحنط عناكب، سرحت وحكيت إنه الفراشة عمرها قصير وبعد ما تنهي دورة حباتها بشكل طبيعي بتكون بالغالب محتفظة بجمالها، إنه ليش ما احتفظ انا بالجمال واحنطها. وهيك بدأت مشروعي ورح استمر لحد ما ابني حديقة للفراشات وأنا أربيهم واحتفظ بجمالهم.
واجهتني صعوبة إني احصل على انواع معينة من الفراشات خاصة الفراش إلي مش معروف عنا، بس قدرت اتخطى هالمرحلة. حالياً بواجه صعوبة في التسويق للمشروع وكل مبيعاتي حتى الان للأصدقاء والمعارف ومش عارفة من وين أبلش بالتسويق وكيف، بتمنى تدريبات منشأتي تساعدني أكثر من خلال توجيهي لأسوق وأحقق باقي أهداف المشروع.
